കൊടുവള്ളി: തന്റെ മണ്ഡലമായ കൊടുവള്ളിയെ മന്ത്രിമാർ അവഗണിക്കുന്നുവെന്നും അയല്‍ മണ്ഡലത്തിലെ എം.എ.എ അനാവശ്യമായി വികസനത്തില്‍ ഇടപെടുന്നുവെന്നും എം.കെ.മുനീർ. എം.എ.എ. റവന്യൂ മന്ത്രി കെ. രാജനും ന്യൂനപക്ഷ ക്ഷേമ മന്ത്രി വി. അബ്ദു റഹിമാനും കൊടുവള്ളിയിലേക്ക് വിവിധ പദ്ധതികള്‍ക്ക് തുക ലഭ്യമാക്കുന്നതില്‍ തികഞ്ഞ അവഗണനയാണ് കാണിക്കുന്നതെന്ന് ആരോപിച്ച എം.കെ. മുനീർ തൊട്ടടുത്ത മണ്ഡലത്തിലെ എം.എല്‍.എ കൊടുവള്ളിയിലെ പല റോഡുകള്‍ക്കും മന്ത്രിമാരില്‍ നിന്ന് അനുമതി വാങ്ങുന്നുണ്ടെന്ന് പി.ടി.എ. റഹീം എം.എ.എയെ ഉദ്ദേശിച്ച്‌ പറഞ്ഞു. ഇത് തെറ്റായ നടപടിയാണെന്നും മുഖ്യമന്ത്രിക്ക് പരാതി നല്‍കുമെന്നും മുനീർ പറഞ്ഞു.
റവന്യൂ മന്ത്രി അംഗീകരിച്ച മണ്ഡലത്തിലെ 12 പദ്ധതികളില്‍ ഒരു പദ്ധതിക്ക് മാത്രമാണു തുക അനുവദിച്ചത്. പിന്നെ എന്തിനാണ് ഈ പദ്ധതികള്‍ക്ക് അംഗീകാരം നല്‍കുന്നതെന്നും എം.എല്‍.എ ചോദിച്ചു. പദ്ധതികള്‍ക്ക് അനുമതിക്കായി കത്ത് നല്‍കിയാല്‍ അത് മാറ്റിവെച്ച്‌ സ്ഥലം എം.എല്‍.എ അറിയാതെ മണ്ഡലത്തിലെ വിവിധയിടങ്ങളില്‍ വെള്ളപ്പൊക്ക ദുരിതാശ്വാസ ഫണ്ടില്‍നിന്ന് റോഡിനും മറ്റും ഇടതുപക്ഷ കൗണ്‍സിലർമാർക്ക് ഫണ്ട് അനുവദിക്കുകയാണ് മന്ത്രി വി. അബ്ദുറഹിമാൻ. ഇതുസംബന്ധിച്ച്‌അടുത്ത ദിവസം മുഖ്യമന്ത്രിക്ക് പരാതി നല്‍കും. അവഗണന തുടർന്നാല്‍ മന്ത്രിമാരെ വഴിയില്‍ തടഞ്ഞുള്ള പ്രതിഷേധം നടത്തുമെന്നും എം.കെ. മുനീർ എം.എല്‍.എ പറഞ്ഞു.
അതേ സമയം എം.കെ. മുനീറിന്റെ പ്രസ്താവനകള്‍ക്കെതിരെ പി.ടി.എ. റഹീം രംഗത്തുവന്നു. നിയോജക മണ്ഡലത്തിലെ ജനങ്ങളുടെ ന്യായമായ ആവശ്യങ്ങള്‍ സർക്കാറിന്റെ ശ്രദ്ധയില്‍ പെടുത്താൻ താൻ ഇടപെടുന്നത് പാർട്ടി നിർദേശ പ്രകാരമാണെന്ന് പി.ടി.എ റഹീം എം.എല്‍.എപ്രതികരിച്ചു. കഴിഞ്ഞ എല്‍.ഡി.എഫ് സർക്കാർ കൊടുവള്ളി മണ്ഡലത്തിന് അനുവദിച്ച പദ്ധതികള്‍ പ്രാവർത്തികമാക്കാൻ നടപടി സ്വീകരിക്കുന്നതില്‍ എം.കെ. മുനീർ പൂർണമായും പരാജയപ്പെട്ടിരിക്കുകയാണ്.
കൊടുവള്ളിയിലെ ഗതാഗതക്കുരുക്ക് പരിഹരിക്കുന്നതിന് വിഭാവനം ചെയ്ത സിറാജ് ഫ്ലൈ ഓവർ സംബന്ധിച്ച തന്റെ നിയമസഭാ ചോദ്യത്തിന് ലഭിച്ച മറുപടിയില്‍ പദ്ധതിക്ക് തുരങ്കം വെച്ചത് എം.എല്‍.എയും നഗരസഭയുമാണെന്ന വസ്തുത വെളിപ്പെട്ടതാണ് അദ്ദേഹത്തെ പ്രകോപിപ്പിച്ചതെങ്കില്‍ ഇത് ഉള്‍പ്പെടെ കൊടുവള്ളിയുമായി ബന്ധപ്പെട്ട വിഷയങ്ങളില്‍ ഇടപെടുന്നത് തുടരുമെന്നും പി.ടി.എ. റഹീം എം.എല്‍.എ പറഞ്ഞു.