മൈസൂരു: കെഎസ്‌ആര്‍ടിസി സ്വിഫ്റ്റ് ബസ് മൈസൂരുവിന് സമീപം അപകടത്തില്‍പ്പെട്ടു. കോട്ടയത്ത് നിന്ന് വന്ന ബസ്സാണ് അപകടത്തില്‍പ്പെട്ടത്.നഞ്ചന്‍കോടിന് സമീപമാണ് അപകടം ഉണ്ടായത്. ഡിവൈഡറില്‍ തട്ടി ബസ് മറിയുകയായിരുന്നു. 5 യാത്രക്കാര്‍ക്ക് സാരമായി പരിക്കേറ്റു. ഇവരില്‍ രണ്ടുപേര്‍ സ്ത്രീകളാണ്.
പരിക്കേറ്റവരെ മൈസൂരുവിലെ ആശുപത്രിയിലേക്ക് മാറ്റി. ഡ്രൈവര്‍ക്കും സാരമായി പരിക്കേറ്റിട്ടുണ്ട്. 37 യാത്രക്കാരാണ് ബസ്സിലുണ്ടായിരുന്നത്. ബെംഗളൂരുവില്‍ പഠിക്കുന്ന വിദ്യാര്‍ത്ഥികള്‍ ഉള്‍പ്പെടെ യാത്രക്കാരായി ഉണ്ടായിരുന്നു. ഡ്രൈവര്‍ ഉറങ്ങിപ്പോയതാകാം അപകട കാരണമെന്നാണ് നിഗമനം.