NADAMMELPOYIL NEWS
SEPTEMBER 13/2022
കൊടുവള്ളി: വാഹനപരിശോധനയ്ക്കിടെ മാരകമയക്കുമരുന്നുമായി യുവാവ് പിടിയിലായി. കൊടുവള്ളി വാവാട് സ്വദേശി പുലിക്കുഴിയിൽ മിഥ്‌ലാജ് (27) നെയാണ് താമരശേരി പോലീസ് അറസ്റ്റുചെയ്തത്. ഇയാൾക്കൊപ്പമുണ്ടായിരുന്ന കൊടുവള്ളി സ്വദേശി സാജിദ് സംഭവസ്ഥലത്തുനിന്ന് രക്ഷപ്പെട്ടു. ഇയാൾക്കായി അന്വേഷണം ആരംഭിച്ചിട്ടുണ്ട്. ഇവർ സഞ്ചരിച്ച കാറിൽ നിന്നും മിഥ്‌ലാജിന്റെ പക്കൽനിന്നുമായി 8.360 ഗ്രാം തൂക്കം വരുന്ന 21 എംഡിഎംഎ ഗുളികകളും ക്രിസ്റ്റൽ രൂപത്തിലുള്ള 650മില്ലിഗ്രാം മെത്താ ആംഫിറ്റമിനുമാണ് കണ്ടെടുത്തത്. പ്രതികൾ സഞ്ചരിച്ച കാറും കസ്റ്റഡിയിലെടുത്തു. മിഥ്‌ലാജിനെ താമരശേരി കോടതിയിൽ ഹാജരാക്കി റിമാൻഡ് ചെയ്തു.
ഞായറാഴ്ച വൈകിട്ടു നടന്ന വാഹനപരിശോധനയ്ക്കിടെ വയനാട് ഭാഗത്തുനിന്നും ദേശീയ പാതയിലൂടെ വരികയായിരുന്ന കാർ പോലീസ് കൈകാണിച്ചിട്ടും നിർത്താതെ മുന്നോട്ടുപോകുകയായിരുന്നു. തുടർന്ന് എലോക്കര പെട്രോൾപമ്പിനു സമീപം വച്ച് കാർ ബൈക്കിലും ലോറിയിലും ഇടിച്ച് അപകടമുണ്ടായി. ഇതേത്തുടർന്ന് നാട്ടുകാർ വാഹനം തടഞ്ഞിട്ടു. പോലീസെത്തി പരിശോധിച്ചപ്പോഴാണ് മയക്കുമരുന്ന് കണ്ടെത്തിയത്. ഇതിനിടെ കാറിലുണ്ടായിരുന്ന സാജിദ് അപകടത്തിൽ പരിക്കേറ്റ ബൈക്ക് യാത്രികരെ ഈങ്ങാപ്പുഴയിലെ സ്വകാര്യആശുപത്രിയിലേക്ക് കൊണ്ടുപോകുകയും അവിടെ നിന്ന് മുങ്ങുകയും ചെയ്തു.
മയക്കുമരുന്ന് ഇടപാടുകളുടെ വിവരങ്ങളടങ്ങിയ നോട്ട്ബുക്ക് കാറിൽനിന്ന് കണ്ടെടുത്തിട്ടുണ്ട്. ഇതിൽ ചില പേരുകളും വ്യാപാരത്തിന്റെ കണക്കുകളുമാണുള്ളത്. വിദ്യാർഥികൾ മുതൽ പ്രഫഷണലുകൾ വരെയുള്ളവർക്ക് ഇവർ മയക്കുമരുന്ന് എത്തിച്ചുനൽകുന്നതിന്റെ സൂചനകൾ പുസ്തകത്തിലെ വിവരങ്ങളിലുണ്ട്. ഇതിന്റെയും മിഥ്‌ലാജിൽ നിന്നും ചോദ്യംചെയ്യലിൽ ലഭിച്ച വിവരങ്ങളുടെയും അടിസ്ഥാനത്തിൽ മയക്കുരുന്ന് വിതരണശ്യംഖലയിലെ കണ്ണികളെ കണ്ടെത്താനുള്ള നീക്കത്തിലാണ് പോലീസ്. താമരശേരി എസ്‌ഐ ലളിത, ജൂണിയർ എസ്‌എൈ ശ്രീജിത്ത്, എഎസ്‌ഐ ജയപ്രകാശ്, ഡ്രൈവർ ജിലു സെബാസ്റ്റ്യൻ എന്നിവരുടെ നേതൃത്വത്തിലായിരുന്നു പരിശോധന. പ്രതിയെ കസ്റ്റഡിയിലെടുക്കുമ്പോൾ ഹൈവേ പോലീസും സ്ഥലത്തെത്തിയിരുന്നു.